من الحاجات المتفق عليها في العلوم النفسية. ان مفيش حاجة اسمها انسان سوي او طبيعي..مفيش تعريف للسواء اصلا....كل اللي تقدر تقوله ان فلان ده معندوش أعراض لاضطراب نفسي في الوقت الحالي
والاضطراب النفسي بيتعرف بصفة أساسية ومجموعة صفات تانية لازم تبقى موجودة....وكل دول موجودين لفترات زمنية محددة..والاهم انهم يكونوا مسببين مشاكل للشخص وضغوط وضيق..او مشاكل في العمل أو العلاقات الاجتماعية
دول شروط علشان اقول على حاجة اضطراب نفسي...
مش موجودين ممكن الحالة دي لا تعدو كونها ظاهرة نفسية شديدة او حتى تنوع طبيعي للسلوك البشري
مدارس علم النفس المختلفة..اتفقت تقريبا على حاجة واحدة..كلنا عصابيين بنفس نوع العصاب الاختلاف في درجة العصاب وشدته...ولغاية كدة برضو احنا في الحدود الطبيعية اللي نقدر نقول مفيش اضطراب نفسي
وكقاعدة .السلوك الشديد المتطرف يعكس خللا في التوازن النفسي...حاجة ناقصة ..مفيش توازن بين حاجتين...وبرضو ده مش اضطراب نفسي...كلنا بنمر بحالات عدم التوازن بشكل متكرر ودوري
كمان ممكن تكون شخص متوازن...بس في وضع اجتماعي. عاملك ضغط ومشكلة وعامل مشاكل في شغلك والاخرين
الفيصل الاساسي ...انت...مستريح داخليا وفي سلام ولا لا..فعال في الدنيا ولا لا. عملك ماشي كويس .علاقاتك بالاخرين متوازنة ومفيش مشاكل
حتى اللي عنده اضطراب نفسي أو مشكلة نفسية...وأحيانا مفيدة على مستوى الشخص والجميع
في أمثلة كثيرة جدا على تقدم وعمل وفنون واختراعات قدمها ناس تم تشخيصهم باضطرابات نفسية مش بس كدة ده السبب في ده هو الاضطراب النفسي
اعمال السلامة والأمن محتاجة حد نمكي وموسوس بدرجة ما
وأعمال التحقيق محتاجة حد شكاك بدرجة ما
وأعمال الفنون محتاجة حد هيستيري بدرجة ما
وأعمال القيادة محتاجة حد نرجسي بدرجة ما
الاختراعات تمت من ناس خايفة او ناس محتاجة حاجة او ناس اتقال عليهم غريبو الاطوار
الفيزيا والرياضيات واعمال البرمجة كان متميز فيها ناس عندهم سمات توحد
الادب محتاج ناس عاطفيين بزيادة
وهكذا
يبدو أننا اتخلقنا بكل الاوبشنز ...بس في ناس عارفاها كلها وناس لا..ناس تجاهلت بعضها وناس استخدمت حاجات زيادة عن اللزوم..ناس مش عارفة تستخدم الاوبشنز اللي عندها
حتى لو مؤمن بالتطور...لو الخوف والكراهية والغضب والعدوان والاحساس بالتقزز والسادية والمازوخية والطمع والاحساس بالذنب والاكتئاب والنرجسية والآليات الدفاعية و التحيزات المعرفية موجودين...ما داموا ملهومش لازمة ..كانوا راحوا واختفوا
كل شى مفيد في وقت وحالة وظرف
جوهر العلاج النفسي لاضطراب والظاهرة النفسية وحتى التنمية البشرية ..هو معرفة كل الاوبشنز بتاعتك...وإعادة التوازن ...وازاي تشغلها وامتى...وتبقى تحت سيطرتك...وايه الادوات الاساسية اللي ماشية معاك دايما وايه الادوات الاستثنائية اللي ليها اوقات محددة وبتبقى ضرورة وقتها..وكل ده يبقى تحت سيطرتك
ولما تسمع طارد احلامك او قلل سقف توقعاتك وتنازل عن احلامك..الاتنين صح
خاف او واجه مخاوفك الاتنين صح
حافظ على كرامتك وبطل الاعتداد بالنفس الاتنين صح
ثق في الناس أو لا تثق عادي الاتنين صح
وغيرهم
الفيصل تعرف امتى وفين وازاي ومع مين..ومين فيهم القاعدة والاساس ومين الاستثناء
تعليقات
إرسال تعليق