تقريبا اغلب المشاكل اليومية بتيجي من الناحية دي....حد تعدى حدوده واتدخل في اللي ما لوش فيه....انت اتعديت حدودك وحبيت تفرض سيطرتك بشكل ما على الاخرين
الهوس بالسيطرة والتحكم في الاخرين...هو ببساطة اني عايز الاخرين يتصرفوا بطريقتي ..على مزاجي...باللي شايفه انا انه الصح...اني اكون انا اللي في مقعد السائق في حياة الاخرين..وامشيهم يمين او شمال او قدام او ورا او اقف بيهم...مش مهم..انا شايف الصح
او في الشكل المتطرف بعتبر الاخرين عرايس ماريونت انا اللي احركهم زي ما انا عايز
هو كمان المشكلة مش كدة حد ماشي يدي اوامر او نصايح او توجيهات بدون داعي وبدون وجه حق ...لو كانت كدة عادي...ممكن ترد عليه ده مش شغلك...او تقوله شكرا على نصيحتك وتطنش..او تعمل نفسك مش شايفه...
المشكلة هو بيتدخل او بيدي الامر او النصيحة او التوجيه بدون ما يتطلب منه والاهم انه متوقع انك هتنفذ اوتوماتك...ولو منفذتش يا ويلك يا سواد ليلك....ودي العلامة الاهم
احنا بنعمل ده يوميا بدرجة ما وبيتعمل فينا بدرجة ما...واحتمال كبير منكنش عارفين اننا متحكمين. بس مع الاخرين بنقولها...شايف نفسه...عايز يفرض سيطرته..حشري
مش بس كفاية اننا نعرفهم الاهم نعرف ميلنا احنا للتحكم والسيطرة والحشرية وعلشان كدة مهم نعرف الصفات والسلوكيات
1..هم عارفين بالظبط مشكلتك من غير متقولهم او من غير ما تتكلم...
ميعرفوش اصلا حاجة اسمها استئذان...او استدعاء
اول ما تبدا تحكي حاجة في حياتك او شغلك فجأ ينط انت ازاي كدة...مشكلتك كيت وكيت وحلها كيت وكيت
ولو قعدت تفهموا ان تشخيصه للمشكلة غلط مش هيقدر يفهم ولا هيسمع هو بس عايزك تفتح الكشكول وتكتب وراه التوجيهات وبس
هيموت ويعلمك اللي انت مش عارفه
وتحس ان دوره في الحياة يدور على اصحاب المشاكل اللي مش شايفينها ويحلهالهم
او يشوف غلطة او حاجة مش على مزاجه في بوست ....طيران يصححها او يامرك تغيرها الخ
شايفين نفسهم معلمين ومصلحين واصحاب رسالة في حياتهم ..ومشغولين بتوجيه الاخرين وناسيين نفسهم
ومستغربين ازاي الناس مش شايفين اللي هم شايفينه...ازاي الناس شايفين الامور بشكل مختلف...ازاي الناس مش شايفة اخطاءها ..ازاي الناس مش عايزة تتعلم الصح….ازاي الناس مش عايزين ييجوا عندي اعلمهم الصح والغلط...ازاي مش راضين ينفذوا اللي بقوله ولا عايزين يفهموه او يسمعوه ازاي بيعارضوا وهلم جرا
انا محبط..بهاتي ومحدش سامع الخ
كتير منهم عندهم مشكلة في الرؤية...رؤيتهم للامور احادية ومحدودة
ومش قادرين يشوفوا الامور من منظور اخر او بطريقة تانية
ولا قادرين يشوفوا التنوع والاحتمالات
.
لو خالفتهم انت ببساطة وبكل اريحية مخطئ ...ولو الموضوع مهم انت مش بس مخطا انت شرير او غبي او الاتنين
اي حد يخالف ارائي وافكاري على الاغلب غبي او جاهل او شرير او مكابر او مش فاهم او حيوان الخ
يضع نفسه في كرسي الموجه والمعلم وانت اسمع فقط وتدون وتنفذ...ولا تناقش مطلقا والويل والثبور وعظائم الامور لو خالفت
2.. يغضبون بشدة لو معملتش بنصيحتهم او توجيهم او اوامرهم او طلباتهم او احلامهم حتى
كلنا بندي نصابح طول اليوم بس مش طول الوقت متوقعين الناس تنفذها بدون نقاش او حتى تنفذها. من اساسه
المهوسين بالسيطرة بيدي النصيحة وبينتظر تنفيذك ليها
ولو منفذتش او حتى ابديت رايك انك مش واثق او عندك رغبة تانية ولو حتى شكرته بصدق على نصيحته... ما دام منفذتش تبقى ليلتك مطينة بطين.. الجنان يشتغل.. انا ليه اضيع وقتي وانصحك انا غلطان اني نصحتك انا استاهل اللي يجرالي انا كان مالي انا اللي غلطان اني خايف عليك الخ
3..عندهم قواعد شخصية خاصة بيهم ومتوقعين انك هتنفذها
الناس دي عاملين قواعد واسطمبات وقوانين ومفروضات وواجبات ولوايح وتصورات لكل شئ وشايفين انها الصح وانها قانون عام وبديهي وشامل والكل لازم ينفذه
الاخلاق المفروض تبقى كدة ...الناس المفروض تعيش كدة... الشغل المفروض يبقى ازاي... الحب بالشكل ده ...الرجالة المفروض يعملوا كذا ...الستات ...الزواج ...تربية الاطفال.. التعامل مع الناس ...المشي ..الاكل... اللبس ....اي حاجة تقريبا ليها قواعد وقوانين هما حاطينها وشايفينها
والمفروض ان الكل يلتزم بيها...هم اصلا مش مهتمين برايك في قواعدهم ايه ..انت هتتفنط وهتتوزن وهتتقاس بناءا على التزامك بالمعايير واللوايح دي ولا لا...سنتك هابقى سودة لو خارج في موعد وهم شايفين انك لازم تجيب وردة حمرا وتلبس بدلة بيضا وجزمة سودا. وحالق نص شنبك ومفتحتش باب العربية ولا سحبت ليهم الكرسي ...هتبقى مبتفهمش في الرومانسية اصلا
مثلا من القواعد اللي المفروض انت وبقية البشرية تلتزم بيها بدون حتى استئذان:
تبقى قلة ادب وجليطة لو مردتش على الايميل او شوفت الرسالة او مردتش على المكالمة في خلال وقت محدد
لو معندكش معلومات مؤكدة او مصادر او حقائق بخصوص كلامك يبقى متقولوش او متتكلمش... مفيش حاجة اسمها رأيي...الحقائق بس هي اللي تتكلم
يا ريت يا ناس اللي بيفهم بس هو اللي يتكلم
من غير اللائق انك تعمل كذا في مكان عام
5..اغلب المهوسين للسيطرة والتحكم مس شايفين انهم مهوسين بالعكس شايفين اللي بيعملوه طبيعي وعادي ببساطة لان هو ده الصح....يعني هو اللي يقول الصح يا جدعان يطلع من البلد...يعني علشان بامر بالمعروف ابقى جلياط ومعنديش ذوق
هتقابل ناس مهوسين بالتسلط باستمرار ومش هتقدر تتجنبهم ...بس انت تقدر متكونش منهم شوف مثلا
العلامات..طريقتك في فرض رؤيتك على الناس ....وصلحها
وللحديث بقية
تعليقات
إرسال تعليق